Берлинде «Паралимпиадашы» фильмінің тұсаукесері

Берлинде қазақстандық кино күндері аясында «Паралимпиадашы» фильмінің еуропалық тұсаукесері өтті. Отандық фильмнің сюжеті спортта үлкен жетістікке жетуді армандаған шаңғышының өмірі туралы. Алайда, апаттың салдарынан басты кейіпкер мансабын жалғастыру мүмкіндігінен мүлдем айрылады. Осылайша, оның өмірі паралимпиадашылармен кездесуден кейін түбегейлі өзгереді. Спорт жанрындағы туынды көрерменді  соңына дейін қызығуышылық сезімінде ұстайды. Себебі басты кейіпкердің өмір жолында кездескен барлық қиындықты еңсере ме жоқ па, арманына қолы жете ме барлығы соңында белгілі болады.

Маттиас Фоллерт, ГФР СІМ Оңтүстік Кавказ және Орталық Азия департаментінің басшысы:

– Фильм маған әсер етті. Өте ұнады. Бұл алдына өр мақсат қойған жігіт туралы қайғылы әрі әдемі хикая. Алайда бір сәтте бәрі өзгеріп, оның өмірінде қара кезең басталды. Жаңа достары оған көмекке келіп, ол өз мақсатына жете бастайды. 

Марие-Кристине Кноп, көрермен:

– Фильмге тәнті болдым. Авторлар шиеленіскен хикаяны жан толғаныстарымен үйлестіріп, біз кейіпкерлермен бірге уайымдап отырдық. Олармен бірге бірде қуанып, бірде мұңайып отырдық. Мансап, отбасы, достық. Мұның бәрі бар. Кино маған қатты әсер етті.

Көрсетілімнен кейін көрермендерді тосын сый күтті. Фильмнің премьерасына арнайы түсірілім тобы келіп, шетелдік көрермендермен кездесті. Жүздесу барысында олар шығармашылық процесс, тыс қалған кадрлар мен қиындықтар туралы айтты.

Алдияр Байрақымов,  «Паралимпиадашы» фильмінің режиссёрі:

– 2018 жылы Пчёнчханда паралимпиадада алтын жүлде ұтқан отандасымыз Александра Колядинмен болған шынайы оқиғадан шабыт алдым. Біз адамдарды ынталандыратын кино түсіргіміз келді. Көргеннен кейін ізгі істер жасауға ниеті болсын деп. Щучинскте түсіргенде қатты аяз тұрып, күшті желден декорацияларымыз ұшып кеткен. Асқар Ілиясов жұқа жейдемен тұрған. Ол спортшының тек шаңғы тебуіне ғана арналған. Ал біз ұзақ уақыт көп дубль түсірдік қой. Бәріміз оны жылытып отырдық. Оған қоса актерлеріміздің көбісі шаңғы тебе алмайтын. Олимпиада чемпионымыз Елена Хрусталёва бір айда бәрін үйретті. 

«Паралимпиадашы» фильмі әлемдік көрсетілімін бастады. Берлинге дейін картина Ташкентте көрермен назарына ұсынылды. Енді авторлар оны Франция мен АҚШ-та көрсетуді жоспарлап отыр.