Қозоғистон IT-стартапи Марказий Осиёда энг яхши деб тан олинди

Улар Бишкекда бўлиб ўтган Central Asian Tech Awards танловининг етти номинациясидан учтасида ғолиб бўлди. Лойиҳаларнинг ҳаммаси Астана Хаб халқаро технопарки иштирокчилари. Темирйўл ташуви ва соҳадаги бизнес жараёнларни автоматлаштиришга мўлжалланган айти-майдончани яратган мамлакат компанияси «Йил кашфиёти» бўлди. Сайт  компаниялар юкларини атиги 5 дақиқада рўйхатдан ўтказиши ва юк жаҳоннинг қайси нуқтасида ҳаракатланаётганини телефон орқали кузатиб бориши учун имконият беради. Ишланма орқали ички юкларнинг 95 фоизини компания онлайн рўйхатга олади. Майдонча Қозоғистоннинг Марказий Осиё транспорт ва рақамли хабига айланиши учун хизмат қилади. 

Бахит Ержанов, IT-майдонча яратган компания бош директори:

- Бу лойиҳа минтақага катта таъсир кўрсатади, чунки барча, жумладан, Қозоғистон темирйўллари, Хитой темирйўллари маъмуриятларини интеграциялаш бўйича ишлар бошлаб юборилди. Мазкур икки давлат ўртасида яқин алоқа ўрнатилган. Хитой ва Россиядан келаётган юкларни кўриб турамиз. Хитой ва Россиядаги ҳамкасбларимиз ҳам Қозоғистондан бораётган юкларни кузата олади. Ўзбекистон ва Озарбайжон билан бу йўналишда ишлар бошлаб юборилган.

Бахит Ержанов таъкидлашича, ғалаба қозонган компания АҚШдаги Кремний водийсига бепул йўлланма олди. Таъкидлаш лозимки, танловда 114 та лойиҳа қатнашди, шундан 39 таси Қозоғистондан.

Айгерим Айдархан, Astana hub халқаро муносабатлар ва инвестициялар офиси директори вазифасини бажарувчи:

- Астана Хаб резидентлари шундай муваффақиятга эришганидан жуда мамнунмиз. Экспортни ривожлантиришда ёрдам кўрсатиш, халқаро бозорларга олиб чиқиш ниятидамиз. Бизда имтиёзли солиқ тизими, турли преференциялар ва стартапларни ривожлантириш дастурлари бор. Марказий Осиёдаги энг йирик айти-стартап технопарки бўлган Астана Хабнинг асосий миссияси – минтақада экспорт салоҳиятини кенгайтириш. Айти-маҳсулотлар экспортини 2025 йилгача 500 миллион долларга етказамиз. 

Абдумалик Сарманов таржимаси