Жасанды интеллект: ЕАЭО ғаламдық үдеріс көшінен кеш қалмауы керек

Еуразиялық экономикалық одақ ғаламдық үдеріс көшінен кеш қалмауы керек. Әсіресе, дүние жүзінде жасанды интеллект саласындағы бәсекелестік күннен күнге артып келе жатқанда. Қасым-Жомарт Тоқаев Минскте өткен Еуразиялық экономикалық форумның пленарлық сессиясында сөз сөйлеп, ұйымға мүше мемлекеттерге тенденциядан қалыс қалмауға шақырды.  Биылғы форумның тақырыбы - «Еуразиялық экономикалық интеграция стратегиясы: қорытынды мен перспектива» аясында болды. Ұйымға мүше 5 мемлекеттің экономикалық әлеуеті қазір 2,6 триллион долларға жеткен. Президенттің айтуынша, 2030 жылға қарай жасанды интеллект әлемдік ЖІӨ-ге 15 триллион доллардан астам үлес қосып, кемі 300 миллионға дейін жұмыс орнын алмастыруы мүмкін. Міне, осындай заманауи сын-қатерлер экономиканы өркендетуде жаңа тәсілдерге жүгінуді талап етеді. Қазірдің өзінде жасанды интеллект коммуникация, көлік, энергетика, өндіріс, денсаулық сақтау және білім беру секілді салаларда өте белсенді.