Анкара мен Астана алыс-берісі 40 пайызға өскен

Астана мен Анкара арасындағы алыс-беріс жаңа белеске көтерілді. Екі елдің тауар айналымы биылдың алғашқы тоқсанында-ақ 1 миллиард 650 миллион долларға жетіп, 40 пайыздық өсім көрсетті. Әсіресе, отандық өнімдердің Түркия нарығына экспорты үдеп, көрсеткіш 60 пайызға бір-ақ секірді. Қазақстаннан Анадолыға негізінен мыс, шикі мұнай, өңделмеген алюминий мен мырыш жөнелтілуде. Сондай-ақ, күнбағыс тұқымы мен құбыр арматурасына да сұраныс жоғары. Десе де, табиғи газ, мақта талшығы мен кейбір көкөніс түрлерінің экспортында бәсеңдеу байқалады. Түркия тарапынан келетін импорт көлемі керісінше, 8 пайызға жуық төмендеген. Бұған құрылыс материалдары мен әйелдер киімінің тасымалы азайғаны себеп болып отыр. Дегенмен, түрік ағайындардан келетін машиналар мен механикалық құрылғыларға, дәрі-дәрмек пен дайын азық-түлік өнімдеріне деген қызығушылық арта түскен.