Қазақстан Еуропамен ынтымақтастықты арттыруға ниетті

2005 жылдан бері Нидерланд Корольдігі Қазақстанға 118 млрд доллар инвестиция салды. Ал 2023 жылы бұл елмен сауда АҚШ валютасында  шамамен 4,5 млрд-ты құрады.

Сондай-ақ Еуропадағы тағы бір маңызды сауда серіктесіміз Бельгия да соңғы 18 жылда Қазақстан экономикасына 12 млрд доллар инвестиция құйған. Өткен жылдың қорытындысына сәйкес бұл елмен тауар айналымы шамамен 524 млн-ға жетті.

Алдағы уақытта да Қазақстан аталған екі мемлекетпен сауда-экономикалық байланыстарды одан әрі кеңейтуді көздеп отыр. Бұл туралы сыртқы істер министрілігі мәлімдеді. Өз кезегінде Нидерландпен өзара тиімді ынтымақтастыққа өткен жылы құрылған бірлескен қазақ-нидерланд ауыл шаруашылығы комитеті серпін береді.

Айта кетейік, Корольдікпен Қазақстан АӨК саласынан бөлек су ресурстарын басқару және басқа да бағыттарда өзара іс-қимылды дамытуға мүдделі.

Бельгияға келетін болсақ, онымен сауда-инвестициялық байланыстарды арттыруда өткен жылы құрылған екіжақты Іскерлік кеңес оң рөл атқаруы мүмкін.

Жалпы, Сыртқы істер министрлігінің пікірінше, Транскаспий халықаралық көлік бағытын дамыту бойынша бірлескен іс-қимылдар Қазақстан мен Еуропа елдері арасындағы сауда-экономикалық өзара іс-қимылды кеңейтуде жаңа перспективаларға жол ашуға мүмкіндік береді.