Қазақстанда 736 ауылда жалпы құны 143 млрд теңге болатын жобалар іске аспақ

Мәдениет және спорт нысандары бой түзейді. Ең бастысы таза ауыз су мәселесін шешуге басымдық берілмек. Үкіметтің кезекті отырысында «Ауыл - ел бесігі» жобасын жүзеге асыру барысы талқыланды. 2019 жылы іске қосылған бағдарлама аясында енді ауылдық аумақтарды дамытудың 2023-2027 жылдарға арналған тұжырымдамасы әзірленген. Жалпы, осы аралықта әлеуеті жоғары үш жарым мың ауылды өңірлік стандарттар жүйесіне сай келтіру межесі тұр. Мақсат - ауыл халқының жайлы өмір сүру ортасын құру.

Әлібек Қуантыров, ҚР Ұлттық экономика министрі:

- Тұтастай алғанда тұжырымдама мынадай тәсілдерден тұрады: ауылдың институционалдық дамуын қамтамасыз ету, әлеуметтік, инженерлік және көлік инфрақұрылымын қарқынды дамыту. Сондай-ақ агроөнеркәсіп кешенін, кәсіпкерлікті, ауыл шаруашылығы кооперациясын дамыту арқылы ауыл халқының табыс деңгейін арттыру көзделген.