Нұр-Сұлтанда «Ойлар жинағы» көрмесі ашылды

Түрлі материалдар мен элементтерден жасалған көркем туындылар. Елордада «коллаж» техникасында жұмыс істейтін белгілі суретші Гүлбарам Асқарованың «Ойлар жинағы» атты көрмесі көпшілік назарына ұсынылды. Шараны ҚР Тұңғыш Президенті – Елбасы кітапханасы «Тәуелсіздіктің мәдени негізі» жобасының аясында ұйымдастырды. Ол Қазақстан мәдениетінің негізін қалыптастыратын отандық бірегей авторлардың шығармаларын көпшілікке таныстыруды көздейді. Көрмеге автордың соңғы 2-3 жылда салған 50-ге жуық картинасы қойылды. «Көз тартар туындылардан көрермен өзіне жақын дүниені, тіпті өздерін көруі де мүмкін», - дейді суретші.

Гүлбарам Асқарова, ҚР Суретшілер одағының мүшесі:

- Мені көбіне саяхат, оқыған кітаптарым, түрлі әуендер шабыттандырады. Солардан алған әсерімді кейін шығармаларымда бейнелеймін. Картиналарды соңғы 3 жылда салдым. Яғни олардың барлығын жаңа деп айта аламын. Кейбір суреттерді қайта салып шықтым, себебі олардың алғашқы нұсқасы шет елдерде сатылып кетті. Бұл көрме өз көрерменін табады деген сенімдемін. Шара 1 ай көлемінде болады.

Авторы: Ақзер Сегізбай