АИ-92 маркалы бензин бағасы қымбаттайды - фейк ақпарат

Тағы фейк ақпарат бензин бағасына қатысты тарады. Яғни, жанар-жағармай бағасы күрт көтерілмейді. Энергетика министрлігі әлеуметтік желілерде бұл мәселеге қатысты тараған қауесетке бүгін осындай ресми жауап қатты. Әңгіменің төркіні - Еуразиялық экономикалық одаққа мүше елдер арасында мұнай және мұнай өнімдерінің ортақ нарығын құру туралы келісімнен кейін шыққан. Алайда министрлік баға мемлекеттің бақылауында деп отыр. Ал, ортақ нарық құру процессі кезең-кезеңімен жүргізілмек. Бұл жақын арада баға басқа елдермен автоматты түрде теңеседі деген сөз емес, негізінен жұмыстар заңнаманы үйлестіруге бағытталған. Десе де көршілес мемлекеттермен баға айырмашылығының салдарынан жанар-жағармайды елден заңсыз шығару тыйылмай тұр. Бұл ішкі нарықта өнімнің тапшылығына әкеледі. Сондықтан ведомство алдағы уақытта бағаның көтерілетінін де жоққа шығармайды. Тек әзірге мораторий жарияланған. Айта кетейік, Қазақстанда қазір АИ-92 маркалы бензиннің бағасына мораторий жарияланған. Бұл шара инфляцияны тежеу үшін енгізілді.