Қор биржасында сауда көлемі артты

Қор биржасында құнды қағаздар саудасының көлемі артты. Бір жылда KASE бастапқы капитал нарығына шамамен 10 трлн теңгеге облигациялар орналастырған. Оның ішінде 6 трлн теңге қаржы министрлігі мен муниципалдық органдарға тиесілі. 3,5 трлн теңгені агросектор, өнеркәсіпті және жеке бизнесті қолдайтын квазимемлекеттік банктер орналастырған. Ал қайталама нарықтағы корпоративтік облигация саудасы 32%-ға артып, 876,9 млрд теңгеге жетті. Бұл туралы Қазақстан қор биржасының басқарма төрағасы Алина Алдамберген айтты. Бүгінде қор биржасындағы динамика тұрақты. Мамандардың пайымдауынша, елдегі облигациялар нарығы биыл да белсенді көрсеткіштерге қол жеткізбек.

¤

Алина Алдамберген, KASE басқармасының төрайымы:

- Қаржыны ұлғайту жалпы ішкі өнімді өсіру жобасын іске асыруға жұмсалады. Біздің міндет - экономиканы жаңа деңгейге көтеру. Біз көптеген жобаларды квазимемлекеттік сектор жүзеге асырып жатқанын көріп отырмыз және олар үлкен көлемде қаржы тартуда. Келешекте жалпы ішкі өнімнің өсімін 6 пайызға жеткізуді мақсат етеміз. Сондай-ақ,  Global KASE секторында жұмыс істейміз. Онда шетелдік акциялар сатылады. Геосаяси жағдайларға қарамастан АҚШ, Қытай, Еуропада экономиканың өсуі мен базалық мөлшерлеменің төмендеуі күтілуде. Бұл елдегі кәсіпкерлікті дамытуға әсер етері сөзсіз.