Петропавлда су басқан 80 үй жөнделді

Петропавлға тасқын салдарын жоюға келген механикалық бригадалардың жұмысы қызды. Олар облыс орталығында бүгінге дейін 80-ге жуық баспананы жөндеп, 800-ден астамын бұзып үлгерді. Мамандар бар шаруаны күзге дейін аяқтамақ. Жалпы қалада бүлінген үйлерді қайта қалпына келтіруге 600-ге жуық адам жұмылдырылған.

Болат Жисембаев осыдан 17 жыл бұрын «Былғары зауыты» ауданына көшкен. Биылғы тасқын кезінде баспанасы су астында қалды. Қазір оны құрылысшылар  қайта қалпына келтіріп жатыр. 5 миллион теңгеден астам қаржыға қажетті материалдар сатып алынды.