Қазақтың ұлттық музыкасы жетекші музыкалық платформаларға жол тартты

Қазақтың ұлттық музыка өнері «Асыл мұра» деген атаумен әлемдік кеңістікке жол тартты. «Алтын қорда» сақталған 1500-ден астам ән-күй, жыр-терме, ертегі, бесік жыры нұсқалары алғаш рет танымал музыкалық платформаларға жүктелді. Жинаққа 400 күй, 300 жыр-терме, 400 халық және халық композиторларының әндері, 100 ертегі, 50 бесік жыры, 250 ретро ән енгізілген. Аудиожинақтың ерекшелігі – мұндағы 1500 шығарманың көбі алғашқы орындаушылармен, яғни түпнұсқа күйінде берілген. Жинақтағы аудиошығармалар Apple Music, Spotify, Yandex Music, YouTube Music сияқты 100-ден астам әлемдік жетекші музыкалық платформаларда қолжетімді.