Президент: Біздің тарихымыз, бүгініміз және болашағымыз– бір

Мемлекет басшысы Қасым-Жомарт Тоқаев Қазақстан халқын Бірлік күнімен құттықтады. «Бұл – қоғамымыздың мызғымас құндылықтарын паш ететін қастерлі мейрам. Бірлік күні халқымыздың тілектестігі мен ауызбіршілігі, өзара сыйластығы мен құрметі, отаншылдығы мен перзенттік сүйіспеншілігі кеңінен дәріптеледі», – деді Президент. Сондай-ақ: «Біздің көзқарасымыз әртүрлі болғанымен, тілегіміз – бір. «Бірлігіміз – әралуандықта» формуласы мемлекеттік саясат пен азаматтарымыздың күнделікті өмірінің өзегіне айналды» деп жалғаған сөзін Қасым-Жомарт Тоқаев. 1995 жылы 1 мамыр – Қазақстан халқының бірлігі күні болып жарияланды. Бүгінде жер көлемі бойынша 9-орындағы елімізде 130-дан астам ұлт өкілі тұрады. Ұлттық статистика бюросының наурыздағы көрсеткіші бойынша Қазақстанда халық саны 20 млн 532 мың 240 адам болған. Оның 14 млн-нан астамы қазақ болса, қалғанын өзге этнос өкілдері құрайды.

Қасым-Жомарт Тоқаев, Қазақстан Республикасының Президенті:

- Біз бірлік, ынтымақ, этносаралық және конфессияаралық татулық қағидаттарын жаңа Конституцияның преамбуласында нақты көрсеттік. Бұл – Қазақстан халқының саналы түрде жасаған таңдауы. Себебі азаматтарымыз баршаға бірдей құқықтар мен мүмкіндіктер беретін елде, әділ, тұрақты және бақуатты қоғамда тұруды қалайды.