Астана қаласының 2035 жылға дейінгі бас жоспары бекітілді

Қазақстан Үкіметі Астана қаласының 2035 жылға дейінгі бас жоспарын бекітті. Онда елорданың әлеуметтік, тұрғын үй-коммуналдық, көлік және энергетикалық инфрақұрылымын одан әрі дамыту жөніндегі қадамдар белгіленген. Тиісті қаулыға ел Премьер-Министрі Әлихан Смайылов қол қойды. Негізгі қала құрылысы құжаты Мемлекет басшысы Қасым-Жомарт Тоқаевтың тапсырмасы бойынша әзірленген. Бас жоспарды іске асыруға тартылатын инвестиция көлемі 6,3 трлн теңгені құрамақ. Жалпы 2035 жылға қарай Астана қаласы тұрғындарының саны 2 млн 3 мың адамға жетеді деп күтілуде. Осыған байланысты елорданың тұрғын үй қорын 68 млн м2-ге дейін, ал жол желісінің ұзындығын 1000 км-ге ұлғайту жоспарланып отыр, сондай-ақ бес ірі көпір салу қарастырылған.

Динара Алимова, ҚР Премьер-Министрінің баспасөз хатшысы

-Су тұтынудың өсуін ескере отырып, Ертіс-Қарағанды каналынан су құбырымен тәулігіне 210 мың текше метрге сорғы-сүзгі стансасын салу көзделген. Тұтынушыларды жылу және электр энергиясымен қамтамасыз ету мақсатында 3-ЖЭО-ның екінші кезегін, төрт жаңа газ жылу стансасын салу және 2-ЖЭО-ны кеңейту көзделеді.