Қазақстанда мемлекеттік қолдау арқылы креативті индустрия
саласын дамыту жоспарлануда. Бұл үшін еліміздің мәдениет және ақпарат
министрлігі 2029 жылға дейін бағытталған жаңа концепция жасайды. Алайда,
биылдың өзінде сала жан-жақты зерттелмек. Бұл үшін «креативті» сала өкілдері,
сарапшылар мен өңірлік өкілдер тартылады. Олар саланың қазіргі жағдайы мен
әлемдік трендтерді саралайды. Креативті
индустрияны қолдау құқықтық және қаржылық түрде болады. Бұл үшін арнайы қаржы
қоры мен инфрақұрылымдық база құрылады. Сонымен қатар еліміздің өңірлерінде
пікір мен тәжірибе алмасуға арналған диалог алаңдары да ашылады. Сондай-ақ сала
өкілдерінің бастамаларының өрге басуы үшін бірқатар шаралар өткізіліп, оған
халықаралық сарапшыларды шақыру жоспарлануда. Бұның барлығы отандық шеберлер,
дизайнерлер, фотографтар мен қолөнершілердің біліктілігі мен тәжірибесін
арттыруға көмектеседі.
Гүлісхан Нахбаева, ҚР Мәдениет және
ақпарат министрлігінің департамент директоры
– Келесі жылға дейін креативті индустрияны
дамытудың жаңа концепциясын жасауды көздеп отырмыз. Оның ішінде қысқа және ұзақ
мерзімдерді қамтитын стратегиялық жоспарларды анықтап, сол жоспарда өңірлік
ерекшеліктерді де қамтымақпыз. Жоспар ішінде сатылы түрде әр қадамымыз жазылып,
белгіленеді. Биыл біз жоғары лауазымды тұлғалардың қатысуымен форум өткізуді
жоспарлап отырмыз. Атап айтқанда, мемлекет басшысын креативті индустрия
саласының жетістіктері және әлеуетімен таныстыруды жоспарлап отырмыз. Бұл
саланың дамуына зор серпіліс береді. Сондай-ақ, Қазақстан мен қырғызстан
арасында бірлескен «Бір туған фест» форумын өткіземіз.
