Президент Жапония Императорымен кездесті

Мемлекет басшысының Жапонияға ресми сапары Император Нарухитомен кездесуден басталды. Қасым-Жомарт Тоқаев Қазақстан халқы Күншығыс елінің тәртібі мен табандылығын әуелден үлгі тұтатынын айтты. Сондай-ақ, екі елді өзара құрмет пен түрлі саладағы табысты ықпалдастыққа негізделген байырғы достық қатынастар біріктіретінін жеткізді. Император Нарухито Президент Қасым-Жомарт Тоқаевтың алғашқы сапары Жапония мен Қазақстан арасындағы байланыс тарихында елеулі оқиға ретінде қалатынын және екіжақты қарым-қатынасты жаңа деңгейге шығаратынын айтты. Тараптар өзара ынтымақтастық мәселелері және халықаралық күн тәртібі жөнінде пікір алмасты. Одан кейін Президент Қасым-Жомарт Тоқаевтың құрметіне Император Нарухитоның атынан ресми қабылдау өтті. Емен-жарқын әңгіме-дүкен құрғаннан кейін қазақ Президенті мен Император жылы қоштасты.